Qitinneq

ruth_dance

Ruth Montgomery-Andersen, sisamanik ukioqarluni qitinnermik sungiusarnini aallartippaa. Balletsimik Modern Dancemillu ilinniagaqarpoq qitittartut qitinnermillu ilinniartitsisut soorlu Lucille Wheaton, Ygor Youskevitch, Merce Cunningham, Alvin Ailey, Kathryn Ricketts aamma Mary Overlie peqatigisarsimallugit. Ruthip, The San Antonio Symphony Orchestrap aaqqissuussaa “Corpse de Ballet” peqataaffigaa, kingorna Alvin Ailey Dance Theaterimi ilaalerami TV-ikkut aallakaatitassiaq “Memoria” peqataaffigalugu.

Ruthip aningaasarsiutigalugu qitittartutut inuussutissarsiornini naggataarlugu 2003-mi “Crossroads” peqataaffigaa, Indra Lorentzen, The Norwegian Royal Balletsimeersoq eqqumiitsuliornikkut ilitsersuisoralugu.

1993-imi Ruth Montgomeryp qititassiuussineq aallunnerulerpaa. Qitinnermik isiginnaagassiai Japanimi, Danmark, USA, Canadami Savalimmiunilu taamatullu Alaskami Nunatsinnilu takutinneqartarput. Ruthip Modern Dancemik qititassianit atisanik takutitsinerit qititassiuuttarpai. Ruthip ilinniarsimasunik suleqateqarneq nuannareqaa taamaattoq meeqqat inuusuttullu suleqatigalugit nuannarinerusarpaa. Ruthi tamatigoortuuvoq nipilersortartunik eqqumiitsuliortunik allanillu saqqummersitsinerni pikialaartitsinernilu suleqateqartartoq.

2014 Mikiseq. Qititassiuussisoq: Ruth Montgomery-Andersen; Nipilersuusiortoq: Benjamin Mørk; Tunuliaqutalerisoq: Siri Langdalen; Tunuliaqutalerisumut ikiorti: Camilla Nielsen; Ilitsersuisoq ilusilersuisoq: Svenn B. Syrin

Mikiseq tassaavoq ilaqutariinni imigassamik atornerluinermik nakuusernermillu ajornartorsiutilinni ilaqutaasullu akornanni imminut toqunnermik eqqugaasimasuni alliartornermik oqaluttuaq. Mikiseq imaannaanngitsumik peroriartorsimagaluarluni aniguilluarsimavoq ilinniarluarnissamut nukissaqarsinnaasimasoq ullumikkullu  piginnaaneqarluarluni Kalaallit Nunaanni inuiaqatigiinni ajunngitsumik inuuneqarluni tapertaalluartoq.

Mikisip oqaluttuarnerani immiussaatigineqartoq atorlugu oqaluttuaq qitinneq aallaavigalugu oqaluttuarineqarpoq. Oqaluttuaq kalaallisut, qallunaatut tuluttullu immiunneqarpoq taamaaliornikkut isiginnaagassiamik angallassisinnaaneq periarfissinneqarluni. Mikiseq takuteqqaarneqarpoq Kulturip Illorsuani Katuami, apriilip aappaanni 2014, apriilillu ingerlanerani qitinnermik isiginnaagassiaq Kalaallit Nunaanni inoqarfinni allani takutinneqarluni. Mikiseq.

Leave a reply

Your email address will not be published. Required fields are marked *